Кожны купляе гадзіньнік,
Каб не спазьніцца на стрэчу з каханай,
На службу, на працу.
Я сонечны маю гадзіньнік,
Які ўжо нямала гадоў
Без рамонту мне служыць.
Праўда, ў кішэнь не паложыш яго
I не прымацуеш яго да рукі.
Але ён надзвычай дакладны.
Калі хто спытае:
- Якая гадзіна? –
Спынюся,
Як дзед мой ці бацька,
Ступнёю адмеру свой цень
I час да мінуты акрэсьлю,
Час весьніх патокаў, сяўбы,
Уборкі хлябоў,
Ладзьбаваньня,
Вясельляў.
Ніводзін гадзіньнік –
Сярэбраны ці залаты –
Ня можа зраўняцца
З гадзіньнікам сонечным гэтым.
Бо ён адзначае
І час нараджэньня,
І час разьвітаньня зь зямлёй,
Калі цень мой зьнікне
На вечна зялёным
Яго цыферблаце.
1961
|
|
